జూబ్లీహిల్స్ లో చిరంజీవి రాజకీయ కార్యాలయం

సినినటుడు చిరంజీవి రాజకీయ ఆరంగేట్రానికి సమయం దగ్గర పడుతుండటంతో ఇందుకు సంభంధించిన పనులన్నీ శరవేగంగా జరుగుతున్నాయి. ఇందులో భాగంగానే చిరంజీవి రాజకీయ కార్యాలయం జూబ్లీహిల్స్ లోని రోడ్ నంబర్ 46 లో సర్వాంగ సుందరంగా సిద్దమైంది. ప్రిప్యాబ్ టెక్నాలజీతో కేవలం 45 రోజుల్లో తయారైన అధినేత కార్యాలంలో అన్ని సౌకర్యాలు అమరాయి. ఆదివారం (ఆగస్టు 10)అర్ధరాత్రి దాటిన తర్వాత జరిగిన ఈ కార్యాలయ ప్రారంభంలో చిరంజీవి, అల్లు అరవింద్, డాక్టర్ మిత్రా, నాగబాబు, పవన్ కళ్యాన్, రాం చరణ్, అల్లు అర్జున్, కేఎసార్ మూర్తి, కోటగిరి విద్యాధరరావు, చేగొండి హైరామజోగయ్య తదితరులు పాల్గొన్నారు. దీంతో చిరంజీవి పార్టీ కార్యకలాపాలు అధికారికంగా మొదలైనట్లైంది. 1300 చదరపు గజాల విస్తీర్ణంలో 6,500 చదరపు అడుగుల కార్పెట్ ఏరియాతో ఒకే అంతస్థుగా ఇది ఏర్పాటైంది. ఇందులో చిరంజీవికి ప్రత్యేక కార్యాలయంతో పాటు అగ్ర నేతలు (కొర్ కమిటీ)లకు ప్రత్యేక క్యాబిన్లు ఉన్నాయి.
ప్రతి గదిలోను క్లోజ్డ్ సర్కూట్ కెమెరాలు అమర్చి వీటిని చిరంజీవి గదికి అనుసంధానం చేశారు. ఈ కార్యాలం ప్రవేశం నుంచి ప్రతి గదిలోనూ ఏం జరుగుతుందో తెలుసుకునే విధంగా ఏర్పాట్లు చేశారు. అతిధులకు రెండు, సమావేశానికి మరొకటి, పాత్రికేయులతో మాట్లాడేందుకు 80 సీట్ల కెపాసిటి కలిగిన ప్రత్యేక గది ఉన్నాయి. ఇందులో ఎలక్ట్రానిక్ మీడియా కొసం ప్రత్యేక సౌకర్యాలు ఉన్నాయి. అదేవిధంగా రికార్డుల కోసం ఒకటీ, సిబ్బందికి మరొక గది ఇందులో కొలువు తీరాయి. అన్ని గదులు ఏసీతో పాటు, రికార్డు, సిబ్బంది గదుల్లోని కంప్యూటర్లకు చిరు గదికి అనుసంధానించటం జరిగింది. ప్రతి గదిలోను మహాత్మ గాంధి, మదర్ థెరిస్సా, అబ్దుల్ కలాం సూక్తులు వారి పొటోలు ఉన్నాయి. ఇక ఈ కార్యాలయం లోనికి ప్రవేశించగానే రిసెప్షన్ పై భాగంలో రెండు చేతులతో నమస్కరించే చిరు పోటో స్వాగతిస్తున్నట్లు ఉంది. ఈ కార్యాలయమంతా హైటెక్ తరహాలో ఉండగా వాహనాల పార్కింగ్ మాత్రం కొద్దిగానే ఉంది.