22న రానున్న "బుజ్జిగాడు"

ప్రభాస్ హీరోగా దర్శకుడు పూరీ జగన్నాథ్ రూపొందించిన "బుజ్జిగాడు-మేడిన్ చెన్నై" 22న విడుదల కానుంది. త్రిష, సంజన హీరోయిన్లుగా నటించిన ఈ సినిమాను క్రియేటివ్ కమర్షియల్స్ అధినేత కెఎస్ రామారావు నిర్మించారు. ప్రభాస్ సినిమాలన్నింటికంటే భారీ స్థాయిలో అత్యధిక ప్రింట్లతో ప్రపంచవ్యాప్తంగా ఈ సినిమాను విడుదల చేయడానికి కె యెస్ రామారావు సన్నాహాలు చేస్తున్నారు. ఈ చిత్రంలో త్రిష అన్నగా, శివన్న అనే డాన్ పాత్రను మోహన్‌బాబు పోషించారు. ఆయన "డియర్" అనే డైలాగుతో కూడిన మేనరిజమ్ తో కనపడతారని సమాచారం. ఈ చిత్రానికి సంగీత దర్శకుడు సందీప్ చౌతా అందించిన ప్రోమోలు ,పాటలు ఇప్పటికే ప్రేక్షకులలో ఆదరన చూరగొన్నాయి. ఇందులో రజనీకాంత్ వీరాభిమానిగా బుజ్జి అనే పాత్రలో ప్రభాస్ కనిపించనున్నాడు.ఇంతకు ముందు జగన్ డైరెక్ట్ చేసిన "పోకిరి", "దేశముదురు" వంటి సూపర్‌హిట్ సినిమాల రేంజిలో ఈ సినిమా కూడా వర్కవుట్ అవుతుందని ప్రభాస్ అభిమానులు ఆశిస్తున్నారు.