శంకర్ దర్శకత్వంలో చిరంజీవి 149వ చిత్రం!?

ప్రముఖ తమిళ దర్శకుడు శంకర్ దర్శకత్వంలో చిరంజీవి 149వ చిత్రాన్ని రూపొందించడానికి రంగం సిద్దం అవుతోంది. ప్రముఖ నిర్మాత ఎన్ వి ప్రసాద్ నిర్మించతలపెట్టిన ఈ కొత్త చిత్రానికి శంకర్ దర్శకత్వం వహించనున్నట్లు టాలీవుడ్ సమాచారం. నిర్మాత ఎన్ వి ప్రసాద్ అటు శంకర్ కు, ఇటు చిరంజెవికి కూడా మంచి స్నేహితుడు. మరో విషయం ఏమిటంటే దాదాపు నాలుగేళ్ళ క్రితమే శంకర్ తో చిత్రాన్ని చేయడాని, ప్రసాద్, శంకర్ లు ఒక ఒప్పందానికి వచ్చారు. అప్పట్లోనే శంకర్ కు అడ్వాన్సు కూడా ఇచ్చిన ఎన్ వి ప్రసాద్ శంకర్ తో చేయదగిన సందర్భం వెంటనే రాక, వచ్చినా అతి కొద్ది రోజుల్లోనే శంకర్ మరో ప్రాజెక్టులో మునిగిపోతూండటం తో వీరిద్దరి మధ్యన చిత్రం పెండింగ్ అవుతూనే వస్తోంది. శంకర్ కు టాలీవుడ్ మెగాస్టార్ చిరంజీవిని డైరెక్ట్ చేయాలనే కోరిక ఉన్నా, అందుకు సమ్యం కలిసి రాలేదు. అయితే ఇటీవల శంకర్ హిందీ చిత్రం "రోబోట్" ఆగిపోయిన దృష్ట్యా , అతని దర్శకత్వంలో చిరంజీవితో తెలుగు సినిమాను నిర్మించాలనే ఆలోచనను ఎన్ వి ప్రసాద్ చిరంజీవి దగ్గర వ్యక్తం చేయగా, ఆయన సానుకూలంగా స్పందించడంతో మిగిలిన కార్యక్రమాలకు సిద్దమయ్యారని తెలిసింది. ప్రస్తుతం శంకర్ చిరంజీవికి చేయనున్న చిత్రానికి సంబంధించిన కథా రూపకల్పనలో తలమునకలైనట్లు టాలీవుడ్ సమాచారం. ఏదేమైనా చిరుతో శంకర్ చిత్రం అంటే ఎక్కువగా ఆనందపడేది ఆయన అభిమానులే అన్న విషయం నిర్వివాదాంశం.