హృతిక్ రోషన్ హీరోగా బ్రాడ్ పిట్ నిర్మించనున్న హాలీవుడ్ చిత్రం

బాలీవుడ్ ఛార్మింగ్ హీరో హృతిక్ రోషన్ కు అరుదైన అవకాశం లభించింది. "ది ట్రాయ్", "చాకొలెట్ ఫ్యాక్టరీ" లాంటి వైవిద్యమైన చిత్రాలు నిర్మించిన బ్రిల్ స్టైన్ గ్రే ఎంటర్టైన్మెంట్ హృతిక్ హీరోగా ఓ హాలీవుడ్ చిత్రాన్ని నిర్మించనుంది. ఈ సంస్థ అధిపతి అయిన హీలీవుడ్ క్రేజీ యాక్షన్ హీరో బ్రాడ్ పిట్ హృతిక్ రోషన్ కు ఇచ్చిన అవకాశాన్ని హృతిక్ అంగీకరించాడని సమాచారం. గతంలో "పింక్ పాంథర్-2" చిత్రంలో నటించమని హృతిక్ రోషన్ కు ఆహ్వానం వచ్చినా అప్పుడు ఆ అవకాశాన్ని హృతిక్ త్రోసిపుచ్చారు. అయితే బ్రాడ్ పిట్ సంస్థ బ్రిల్ స్టైన్ గ్రే ఎంటర్టైన్మెంట్ నిర్మాణ విలువలపట్ల ఎంతో నిబద్దతతో వ్యవహరిస్తుందని, అందులోనూ వీరు నిర్మించదలచిన కథ హృతిక్ కు ఎంతగానో నచ్చడం వల్ల హృతిక్ కూడా వెంటనే తన అంగీకారాన్ని తెలియజేశాడని సమాచారం. ఈ చిత్రం 2008లో నిర్మాణాన్ని ప్రారంభించుకుని 2009 ప్రధమార్థంలో విడుదలవుతుందని సమాచారం.